ВЕРБАС – Предсидатель Вивершного одбору Националного совиту (НС) Руснацох Желько Ковач и секретар Совиту Таня Арва Планчак вчера нащивели Подручну канцеларию (ПК) у Вербаше, як седму по шоре у тих орґанизованих нащивох подручним канцеларийом. Схадзка отримана у просторийох КПД „Карпати”, дзе шедзиско и ПК НС.
Роботу и проблеми з хторима ше у Вербаше стретаю винєсли члени Координациї Подручней канцелариї – єй предсидатель Деян Загорянски, Еуфемия Ґшвенґ задлужена за информованє, Гелена Папуґа задлужена за службене хаснованє язика и писма, Михайло Тамаш, задлужени за културу, а о образованю поинформовал Загорянски.
Деян Загорянски бешедовал и о роботи секцийох КПД „Карпати”, о инвестицийох на обєкту Дружтва, запланованих активносцох, як и о проблемох вязаних за виучованє руского язика у вербаскей Предшколскей установи „Бошко Буха”.
Окремна часц схадзки була пошвецена стану у ЯП за информованє „Вербас”, хторому тих дньог грожи гашенє, як и инициятиви НС Руснацох же би його окремна делеґация нащивела Општину Вербас пре спознанє на яких способ ше очува информованє по руски, та цо будзе з архиву того подприємства.
На схадзки бешедоване и о финансийох КПД „Карпати”, дзепоєдних проєктох, дзе и проєкт „Явни роботи”, по хторим тераз у Дружтве на пейц мешаци заняти два особи.
На концу розгваркох Желько Ковач придал малюнок Владу Нярадия з його циклусу „Карпатски мит”, як дарунок каждей подручней канцелариї НС у наших местох.
