БЕОҐРАД – У Беоґрадзе, у просторийох Центру за едукативни розвой и стратеґийне планованє пияток, 20. марца, отримани семинар з назву „Писанє предкладох проєктох за амбасади Ческей, Польскей и Словацкей”, на хторим участвовали и штверо представителє Националного совиту (НС) Руснацох.
На семинаре бешедоване о конкурсох хтори розписую спомнути амбасади – хто на нїх ма право конкуровац, о приоритетних обласцох хтори спомнути амбасади помагаю, пре хтори причини прияви найчастейше одбити, о способе пополньованя конкурсних формуларох и апликованя, а начишлєни и приклади проєктох хтори достали средства з тих жридлох.
Наглашене же ше, попри орґанизацийох цивилного дружтва, на тоти конкурси можу приявиц и институциї хтори шє финансую з буджету, як цо то школи, шпиталї, городски управи, национални совити и подобни, потим административни єдинки, та и вирски орґанизациї.
У зависносци од обсягу проєкту, финансийна помоц виноши од 3 000 до 80 000 еври, а обласци хтори финансую то здравство, просвита, гуманитарна робота, панованє правох, добра управа, унапредзенє реґионалного сотруднїцтва, енерґетску ефикасносц, родну ровноправносц и инше.
Средства ше обезпечує и за проєкти за злєпшанє условийох роботи, як цо то за реконструкцию и реновиранє обєктох, набавянє средствох и опреми за роботу и подобне.
Спред НС Руснацох на семинаре о писаню проєктох участвовали Иван Канюх, Марина Гайдук и Анамария Ранкович, як члени одборох за младеж, образованє и информованє НС, та директорка Руского народного театру „Петро Ризнич Дядя” Ивана Дудаш, як представитель институциї чий НС Руснацох снователь.