НОВИ САД/КОЦУР/ДЮРДЬОВ/СРИМ/ВЕРБАС – Нєшка Миколая по юлиянским календаре, а попри нєшкайших богослуженьох з нагоди швета, Миколай вчера дочекани у векшини наших парохийох, дзе вечар у церквох орґанизовани пригодни програми на хторих Миколай дзецом подзелєл дарунки-пакецики.
У новосадскей церкви Святих апостолох Петра и Павла вчера вечар по Служби Божей дзеци котри ходза на виронауку з интересантну програму привитали Миколая, а вон им, вєдно з ангелами, подзелєл пакецики. Програму з дзецми пририхтала вироучителька Мелания Римар, а того року Миколай у Новим Садзе подзелєл 79 пакецики, хтори обезпечели родичи, а порихтала панїматка.
У церкви Успения пресвятей Богородици у Коцуре предшколски дзеци Миколайови виведли драмско-музичну програму, хтору з нїма пририхтали вироучителька Ксения Бесерминї и шестра Михаила Воротняк. По програми Миколай дзецом подзелєл коло 200 пакецики, а потим нащивел и дзеци з окремнима потребами у Каритасу, котрим тиж подзелєл пакецики.
У дюрдьовскей церкви Рождества Пресвятей Богородици вчера по Саночним з нагоди Миколая дзецом подзелєни сто пакецики, хтори финансовали спонзоре и парохия, а пририхтали их и подзелєли члени Церковного одбору.
И у наших сримских парохийох Миколай вчера вечар нащивел нашо церкви, а перше бул у у Беркасове, дзе подзелєл 14 пакецики, потим у Шидзе подзелєл 42 пакецики, а на концу у Бикичу дзецом подзелєл 33 пакецики.
Миколая вшадзи дочековали виронаучни дзеци и школяре котри ходза на виборну наставу руского язика з елементами националней култури, котри му виведли кратшу програму – драмску сличку „На Миколая“, одшпивали „О хто, хто“ и рецитовали Миколайови.
У церкви Покрова пресвятей Богородици у Старим Вербаше дзеци школского возросту вчера, з нагоди Миколая, виведли драмску точку, вецей рецитациї и шпиванки, а на гармоники их провадзел Любомир Скубан. За програму их пририхтала учителька Славица Мали, а Миколай дзецом подзелєл 66 пакецики.