НОВИ САД – У тогорочним петнастим чишлє новинох „Руске слово” рубрика „Тижньовнїк“ пише о тим чи будзе индустрийна зона у Руским Керестуре, та о тераз актуалней приватизациї медийох.
На рубрики „Нашо места” текст о виборе секретара Месней заєднїци Руски Керестур и, медзи иншим, о вистави ручних роботох и колекционерства у Кули, док тема „Економиї” ярня шатва у хотарох по наших местох.
„Култура и просвита” розпатра проблем малотиражних учебнїкох, а на тих бокох зоз словом и фотоґрафию пренєшена атмосфера з вельконоцних концертох по наших местох и з коцурскей „Шпиваночки”.
Боки „Духовного живота” зазначую преславу Велькей ноци у векшини наших парохийох хтори ю славя по юлиянским календаре, док боки „Мозаїка” представяю нашу єдину ґимназию по руски у Руски Керестуре.
Рубрика „Людзе, роки, живот” пише о Андєли Михняк зоз Шиду, а ту и пияте предлуженє фельтону о двох рочнїцох нашей Установи.
Попри резултатох фодбалских клубох з наших местох, „Спорт” читачох информує и о терашнєй чежкей ситуациї у хторей ше нашол Шаховски клуб „Омладинєц” з Коцура.