НОВИ САД – У тогорочним седемнастим чишлє новинох „Руске слово” рубрика „Тижньовнїк“ пише о трибини о защити руского скарбу и о Округлим столє о руским театре у рамикох 47. Драмского мемориялу. Ту и напис о Медзинародним турнире у одбойки у Руски Керестуре.
„Нашо места” пишу о означованю Дня планети Жеми по наших местох и о инвестицийних укладаньох у општини Кула. Ту и вистка о вимульованю беґелю Вербас-Бездан, та успиху рецитаторох на Покраїнскей смотри.
Рубрика „Економия”, медзи иншим, розпатра хтори места и општини найвигоднєйши за живот по Индексу дружтвеного розвою, а пише и о актуалним знїщованю коровча у хотарох.
На бокох рубрики „Култура и просвита” звити о виведзених представох на тогорочним Драмским мемориялє и огляднуце на 21. Салон кнїжкох у Новим Садзе.
„Духовни живот” зазначел як преславене швето Дзуря у керестурскей парохиї, а пише и о зашеданю Медзинародней владическей конференциї у Беоґрадзе.
Боки „Мозаїка” приноша розгварку зоз шестрами Соню и Аню Гудаковима, котри ше уж роки занїмаю з волонтеризмом.
На бокох рубрики „Людзе, роки, живот” представени Дюро Горняк з Вербасу, котри тераз жиє у Нємецкей, а ту и седме предлуженє фельтону о двох рочнїцох нашей Установи.
„Спорт” приноши резултати у фодбалских лиґох у хторих бавя нашо клуби, а „Розвага” пише о Лидиї Орза, котра свою модну колекцию представела на Тижню моди у Новим Садзе.