Пренайдзме у себе зарно рускосци

731 Опатрене

У тим Новим 2019. року жадам шицким припаднїком нашей рускей заєднїци же би пренашли тото зарно рускосци котре у нас иснує уж телї вики, и же би го посадзели до шерцох своїх наймилших же бизме на тот способ указали себе, а окреме нашим сушедом, же зме ту присутни уж скоро три вики и же ше нашо коренї на тельо попреплєтали, же наш шлїд на тих бачванско-сримских просторох цалком обачлїви и препознатлїви!

На тим факту Национални совит Руснацох у новим зволаню будзе муровац нашу дальшу еґзистенцию у тим мултикултуралним штредку и будзе ше намагац написац нову, актуалну стратеґию отримованя и розвою нашей култури и нашого язика през квалитетни образовни процеси и през правдиве и порядне информованє.

Шицки зме шведкове же процеси транзициї у нашей терашнєй держави тирваю барз длуго, же процес интеґрациї до европскей заєднїци тиж так длуготирваци, же ше у медзичаше зявюю цалком нєвигодни нукашнї, алє и вонкашнї подїї котри нам додатно спомалшую напредованє и розвой. Прето наш стандард скромни, прето нашо млади глєдаю свойо место под слунком у других державох ширцом швета, прето нєт часу у наших каждодньових розпорядкох за квалитетну розвагу, за културни подїї котри би мали окрипиц нашу душу. Нажаль, тиж так зме шведкове же маме и вше менєй учашнїкох и дїячох у култури, а нє лєм конзументох тих културних продуктох. На шицко тото ше ище зявела и велїчезна конкуренция нових диґиталних медийох, Интернету и кабловскей телевизиї, котри нєзатримуюцо лїґаю наш шлєбодни час и даваю нам цалком нови димензиї розваги котра нє ма гранїци, котра ґлобална, чийо критериюми упитни, котри нє подлєгую нїякей контроли, а їх борба за конзументами и патрачами безкомпромисна и ма лєм єден циль – профит.

А то лєм початок ХХI вику, лєм друга декада!

Прето маме у новим зволаню Националного совиту Руснацох членох котри припадаю рижним ґенерацийом, цо нам дава можлївосц интеґрациї богатого животного искуства и интеґритета успишно витвореного и доказаного у професийних, родительских, дружтвених, културних и других обласцох, а источасно нам дава можлївосц злучованя зоз сучаснима трендами у швеце и швижима идеями. З другого боку патраци, члени у велькей векшини маю високу фахову приготовку рижних профилох, а подобне и при членох зоз штредню фахову приготовку. То богата диверсификация професийох цо нам дава вельку моц спатраня з рижних аспектох актуалних задаткох хтори пред Националним совитом и даваня конкретних, оптималних ришеньох. Тото шицко нам дава можлївосц правилного порозуменя и одношеня ґу традициї котра муши буц обовязна карика у повязованю прешлосци и будучносци, бо без того наш шлїд у будучносци скапе – прелїґнє нас ґлобализация.

Прешвечени сом же терашнє, нове зволанє Националного совиту Руснацох ма моци, сцелосци и шмелосци робиц за нашу руску заєднїцу зоз полну анґажованосцу и на тот способ допринєсц лєпшому стану у нашей, рускей заєднїци и тиж так же шицки конструктивни предкладаня буду вислухани, потримани и по можлївосци реализовани на общи хасен и ширшей заєднїци у котрей жиєме.

И на концу, най повторим, посадзме тото зарно рускосци, бо то можеме лєм ми, Руснаци вєдно. Нїхто други то нє пороби за нас.

ПОВЯЗАНИ ТЕКСТИ