РУСКИ КЕРЕСТУР – Здруженє паприґарох Руского Керестура штварток, 18. фебруара, закончело з орґанизованьом тогорочного циклусу жимских преподаваньох, як за своїх членох, так и за шицких других заинтересованих заградкарох и продуковательох паприґи.
Од януара по 18. фебруар Здруженє орґанизовало 10 преподаваня з рижних обласцох заградкарства, найвецей о продукциї паприґи, а преподавали визначни фаховци, медзи нїма и професоре з польопривредних факултетох, та фаховци з рижних польопривредних службох.
Понеже на каждим преподаваню водзена евиденция о чишлє присутних, тогорочни совити фаховцох слухали прейґ 600 заинтересовани Керестурци, алє и з других местох, дознава Рутенпрес од члена Управного одбору Здруженя Душици Орос.
На пияток, 26. фебруара, Здруженє орґанизує и одход до Беоґраду на Саям, после того и едукативну екскурзию до Зренянину, а заинтересовани за одход ше можу приявиц спомнутей Оросовей.