КОЦУР – Внєдзелю, 13. септембра, у велькей сали Месней заєднїци Коцур отримане преподаванє за польопривреднїкох, хторе орґанизовала Полицийна станїца Вербас у рамикох проєкту „Полиция у локалней заєднїци”.
Преподаванє орґанизованє у сотруднїцтве з Општинским совитом за безпечносц транспорту на драгох, Аґенцию за безпечносц транспорту, Авто-мото союзом Сербиї и Аґенцию за консултованє и менаджмент „Н&М”, чийо представителє бешедовали коцурским парастом о безпечним участвованю тракторох и роботних машинох у транспорту, як и о защити при хаснованю превозкох и машинох.
На преподаваню визначене же нєдостаточна ошвиценосц, управянє з тракторами и роботнима машинами под уплївом алкоголу, та наруцованє блата на драгу найвекши причини транспортних нєщесцох и поволали учашнїкох преподаваня най совисно рукую з машинами и притримую ше правилох справованя у транспорту.
По викладаньох, присутни ше найвецей питали о хаснованю ротацийних шветлох у транспорту, нєпреглядносци дзепоєдних драгох у валалє, о реґистрацийох роботних машинох и прикочох, та о других проблемох у транспорту хтори трапя парастох.
На концу преподаваня и розгварки, орґанизаторе присутним подзелєли ротацийни шветла.