КУЛА – Зоз шветочну академию у Културним центре, вовторок, 14. юния, у Кули преславени 160 роки постояня ОШ „Петефи бриґада” и 52 роки терашнєй назви Школи.
Преслава започала у Ґалериї Културного центру з отвераньом вистави старих фотоґрафийох, а потим у Културним центре отримана шветочна академия. Присутних привитала директорка Школи Ержебет Блашко, котра здогадла же школа почала робиц з єдну учальню и єдним учительом, а тераз ма 600 школярох и 72-ох наставнїкох, котри робя у 27 кабинетох.
На програми присуствовал и покраїнски секретар за образованє Михаль Нїлаш и наглашел же ше у тей установи квалитетно роби на образованю на сербским, мадярским, руским и українским язику. Спред локалней самоуправи ювилей повинчовал заменїк предсидателя Општини Кула Кароль Валка.
Програму пририхтали терашнї и дакедишнї роботнїки школи и школяре, а на нєй пречитана и винчованка Националного совиту Руснацох. Єдна з точкох була и кратка драмска представа на штирох язикох, а по руски ґлумела школярка пиятей класи Весна Вонич.
Дзень пред тим, у Школи отримана и традицийна манифестация „Школи хтори ше любя”, на хторей окремни награди достали школяре и їх наставнїки за посцигнути успихи.
Медзи наградзенима и школяре котри були успишни у змаганю з руского язика – Анастасия Джуджар зоз 6. класи, Анастазия Козар 7. класа и Сара Мармила з 8. класи, котра того року преглашена и за школяра ґенерациї (на фотоґрафиї су з директорку Школи).
З нагоди ювилею Школа видала и Билтен о историяту школи и єй дотерашнєй роботи, а у нїм и текст о пестованю руского язика и успихох школярох з того предмету.