КОЦУР – У коцурским хотаре тих дньох почала жатва жита и як Рутенпрес дознава у задруґох, тогорочне жито винїмкового квалитету, а урожаї штреднє коло 3.5 тони по гольту. Медзитим, цена по хторей ше жито одкупює ии нє позната.
Жито одкупюю три одкупни места у валалє – коцурска Роботна єдинка подприємства „Либела продукт” зоз Змаєва, Землєдїлска задруґа „Класка” (одкуп у млїну „Миком”) и маґазин подприємства „Фарм кооп” зоз Србобрану. Жито ше затераз лаґеує, а як гваря, конєчна цена будзе позната штредком юлия, та парасти одлуча чи жито предаю, чи го зохабя на лаґеру и буду чекац лєпшу цену.
Як нєурядово дознаваме на одкупних местох, того року у хотаре єст вельо менєй жита як влонї, насампредз пре нїзку цену, та и добри урожай нє подмири укладаня.
На початку жатви ше тлачи лєм вчасни файти жита, хтори уж дозрели, а єст и таки хтори ище желєни.
Жатву жита у коцурским хотаре вчера претаргнул моцни диждж и витор, так же за даскельо днї будзе предлужена.