Привитане представянє националних меншинох 10. децембра у Беоґрадзе

автор зам
1k Опатрене

БЕОҐРАД – Представителє вироятно шицких националних меншинох у Сербиї хтори орґанизовани прейґ националних совитох (НС) буду участвовац на представяню з нагоди Медзинародного дня людских правох 10. децембра у Беоґрадзе, поведзене на вчерайшей схадзки представительох НС-ох з директорку Канцелариї за людски и меншински права Влади Републики Сербиї Сузану Паунович.

Орґанизатор представяня националних меншинох будзе спомнута Канцелария, хтора и иницировала же би ше Медзинародни дзень людских правох перши раз того року означело и з вельку манифестацию пошвецену припаднїком националних меншинох.

Як Рутенпрес дознава од предсидателя Вивершного одбору НС Руснацох Желька Ковача, котри вєдно зоз секретаром Совиту Таню Арва Планчак присуствовал на вчерайшей догварки у Канцелариї за людски и меншински права у Беоґрадзе, задумка же би представянє меншинох котри жию у Сербиї убудуце постало пракса на Медзинародни дзень людских правох.

– Шицки вчера присутни представителє 17 з 19 националних совитох потримали и привитали тоту идею Канцелариї, визначуюци як барз добру задумку же би ше того, а вец и шлїдуюци роки, национални меншини котри жию у Сербиї вєдно и на єдним месце представели у Беоґрадзе – гварел Ковач за Рутенпрес после схадзки.

Як плановане, заєднїцка, комбинована културно-уметнїцка програма 10. децембра (собота) будзе отримана у єдней з галох Беоґрадского сайму од 10 до 16 годзин, а попри наступу ансамблох припаднїкох меншинох, буду орґанизовани и окремни штанди за  представянє националних кухньох, народного облєчива, старих ремеслох, сувенирох, кнїжкох и виданьох на язикох меншинох и других змистох.

Як порадзене на вчерайшей схадзки, конкретни точки културно-уметнїцкей програми и змисти представяня на штандох НС-ти до Канцелариї маю доручиц по вовторок, 15. новембра, а конєчна програма цалей манифестациї з нагоди Медзинародного дня людских правох ма буц позната на пияток, 18. новембра.

1-Kancelarija-02

ПОВЯЗАНИ ТЕКСТИ