НОВИ САД – У нашей церкви у Новим Садзе внєдзелю, 24. юлия, на богослуженьох хтори служел парох новосадски о. Юлиян Рац, привитани икона и мощи монахинї блаженей Йосафати Гордашевскей.
– Живот нашей блаженей ш. Йосафати нам бешедує же ше нє виплаци жиц лєм за тот швет, алє за живот вични з Богом и у любови. Упознайме святих, вони нам помагаю же бизме лєгчейше дошли до ласкох и вичного живота – гварел о. Рац.
После Службох модлєни пацерки до блаженей ш. Йосафати, у хторих ше, медзи иншим гвари: „Блажена Йосафато, ти цо през цали свой жемски живот помагала хорим, слабим, безнадїйним и духовно опущеним, вислухай нас, цо ше модлїме до Тебе”.
Монахинї служебнїци Нєпорочней Дїви Мариї подробнєйше упознали присутних зоз животом блаженей Йосафати, а вирни циловали єй икону.
Фото Вероника Вуячич