Прилапена Одлука о символох Войводини

автор зам
1k Опатрене

НОВИ САД – Посланїки Скупштини Войводини вчера з векшину гласох прилапели Одлуку о хаснованю и випатрунку символох и традицийних символох Войводини, так же попри терашнього гербу и застави, у ровноправним хаснованю буду и ткв. традицийни герб и застава. За прилапйованє Одлуки гласали 90 посланїки, 6 були процив, а 13 стримани.

За Одлуку гласали посланїки Сербскей напредней странки (СНС), Сербскей радикалней странки (СРС), Союзу войводянских Мадярох (СВМ) и Социялистичней партиї Сербиї (СПС), процив були посланїки Лиґи социялдемократох Войводини (ЛСВ), а посланїки Демократскей странки (ДС) и Руху „Досц було” були стримани.

Традицийни герб Войводини то герб Сербского войводства з 1848. року, а традицийна застава трофарбова – червено-белаво-била.

Предсидатель Покраїнскей влади Иґор Мирович новинаром гварел же приношенє Одлуки о хаснованю символох и традицийних символох АПВ обовязка хтору предписує Статут Покраїни.

– Нєзвичайне же Войводина ма два символи, було би примеране же би у будучносци мала єден, а чи то и будзе завиши од вецей факторох, насампредз од диялоґу власци и опозициї, бо нїкому нє мож надрильовац нїяку одлуку и вона муши буц резултат догварки – гварел Мирович.

Вон визначел же Одлука о хторей ше вчера розправяло у покраїнским парламенту була предложена и пред роком, алє теди нє було векшини за єй прилапйованє.

ПОВЯЗАНИ ТЕКСТИ