Прилапени буджет за идуци рок

автор бас
1k Опатрене

ЖАБЕЛЬ – Скупштина општини (СО) Жабель пияток, 18. децембра, прилапела ребаланс буджету за 2015. рок, як и буджет за 2016. рок, хтори виноши милиярду 155 милиони динари. Понеже за предлуженє вибудови канализациї обезпечени 200 милиони динари з Покраїни, буджет идуцого року будзе баржей унапрямени на помаганє социялно загроженим катеґорийом, особом з окремнима потребами, а и надалєй буду наградзовани найлєпши штредньошколци и студенти.

Новосц же нарок нєзанаяти ваготни жени буду доставац єднократну помоц  – дзешец тисячи динари по пород, а тото право ше одноши на жени котри першираз ваготни и на жени котри маю до тройо дзеци.

Прилапени и проєкт явно-приватного партнерства у обласи явного ошвиценя у шицких штирох местох општини, за цо буду видвоєни 15 милиони динари.

У жабельскей општини нє будзе одпущованя на основи Одлуки о максималним чишлє занятих на нєодредзени часц у явним секторе, понеже єй одобрени 256 особи, кельо и єст занятих, а плаци у явним секторе останю исти.

СО место члена Општинскей ради Стевана Славнича, котри дал задзекованє, за члена Ради з тайним гласаньом вибрала Витомира Лисицу.

Прилапени и програми роботи за 2016. рок шицких штирох Месних заєднїцох и општинских явних установох, як и Ришенє о менованю Комисиї за виробок Предлогу програми защити, ушореня и хаснованя польопривредней жеми у Општини Жабель за 2016. рок.

ПОВЯЗАНИ ТЕКСТИ