ШИД – На 34. схадзки, хтора отримана вчера, Скупштина општини (СО) Шид принєсла биджет за 2016. рок, з хторим вкупни приходи утвердзени на милиярду 214 милиони 401 000 динари, з хторих розпоредзени средства виноша милиярду 184 милиони 401 000 динари.
До чечуцей буджетней резерви опредзелєни 25, а до стаємней пейц милиони динари.
Пред вигласованьом нового, одборнїки прилапели ребаланс буджету за 2015. рок, хтори тераз виноши милиярду 031 милион 886 700 динари.
СО вибрала и нову Виберанкову комисию Општини Шид, а за предсидательку Комисиї менована дипл. правнїца Милица Ракетич (СНС).
Медзи значнєйшима одлуками и тота о утвердзованю максималного числа занятих на нєодредзени час у Општинскей управи, явних подприємствох и установох, а то 478 особи.
Одборнїки прилапели и Одлуку о одредзованю кнїжководительней вредносци општинского маєтку, як и план детальней реґулациї за часц Роботней зони у катастерскей општини Вишнїчево.
На вчерайшей схадзки СО з места директора Културно-образовного центру Шид розришела Бранислава Николича, а за окончователя длужносци директора (до рока) меновала Срдяна Малешевича, бувшого заменїка предсидателя Општини.
Тиж менована и Комисия за виробок Рочного плану зашити и ушореня державней польопривредней жеми, як и Комисия за запровадзованє поступку лицитованя державней польопривредней жеми.
