КУЛА – Дочасови орґан Општини Кула пондзелок, 31. децембра, на схадзки прилапел општински Буджет за наступни 2019. рок котри виноши милиярду 833 милиони 793 тисячи динари.
Предсидатель Дочасового орґану Велибор Милоїчич на схадзки визначел же ше у наступним року предлужи реализовац плановани капитални проєкти, алє и же ше розпочню и нови проєкти, а же трецина буджету опредзелєна за капитални инвестициї.
Медзи найзначнєйшима проєктами визначени роботи на вибудови Спортско-рекреативного центру у Кули, реконструкция парку у центру Кули и роботи у индустрийней зони у Кули.
З буджетом плановани и роботи у шицких населєлних местох општини, як процедура наклада, шицким совитом месних заєднїцох доставени Одлуки о одобрених средствох у складзе з апроприяциями з општинского буджету, цо потребне же би совити прилапели на перших тогорочних схадзкох.
Перша схадзка Совиту Месней заєднїци Руски Керестур будзе отримана у идуцим тижню, а на нєй буду подробнєйше представени проєкти и средства котри опредзелєни з општинским буджетом за наш валал у 2019. року.