НОВИ САД – На пиятковей схадзки Скупштини Городу Нови Сад одборнїки прилапели закончуюци рахунок буджету за 2015. рок, по хторим у каси влонї було коло 21, а потрошени 18,5 милиярди динари. Спрам того, до 2016. року пренєшени коло 2,5 милиярди динари.
Одборнїки з опозициї критиковали городску власц же нєправилно уклада пенєж и же у Новим Садзе нєт капитални инвестициї.
Городоначалнїк Нового Саду Милош Вучевич гварел же буджет стабилни, а наявел и ребаланс буджету пре предлужованє субвенционованя дзецох у приватних дзецинских заградкох и драгову привреду.
О ребалансу годно буц слова уж на пияток, 22. юлия, кеди будзе идуца схадзка Скупштини Городу Нови Сад.