БЕОҐРАД – Скупштина Сербиї того тижня прилапела Закон о спорту хтори, медзи иншим, реґулує висину членарини за малолїтних спортистох, здравствену защиту, та одношеня медзи спортистами и спортскима орґанизациями.
З тим Законом будзе оможлївене шицким же би ше занїмали зоз спортом, же би вон нє бул привилеґия богатих. Предписане же членарина за малолїтних спортистох нє шме буц векша як 10 одсто штреднєй плаци у держави.
Здравствена защита дзецох од шейсц до 14 роки будзе у рамикох обовязного здравственого осиґураня и безплатна, кед ше запровадзує у здравствених установох и заводох. Нови Закон о спорту обовязує спортски орґанизациї же би з предвидзенима сумами осиґурали спортистох под час окончованя спортских активносцох.
Предлужи ше програмске финансованє спорту у Сербиї, локални самоуправи обовязни принєсц правилнїк о финансованю, а средства нє годно дзелїц без транспарентних и ясних правилох. Нове правило же анї єдна спортска оґанизация нє шме достац вецей як 20 одсто буджету за спорт.