ШИД – Скупштина општини (СО) Шид на вчерайшей схадзки прилапела ребаланс буджету за 2016. рок, по хторим вкупни приходи Општини тераз виноша милиярду 170 835 000 динари, чечуца буджетна резерва 10 милиони, стаємна резерва 3 милиони динари, так же цалосни розпоредзени средства виноша милиярду 157 835 000 динари.
Одборнїки прилапели и Програму дїлованя новоснованого ЯКП „Явне ошвиценє, услуги и отримованє“ за 2016. рок, Статут ЯКП „Стандард“ и Статут ЯКП „Водовод“, як и вименки Програми дїлованя „Водоводу“.
СО дотерашнього о.д. директора Културно-образовного центру Шид Срдяна Малешевича меновала за директора тей установи, а после розришеня дотерашнїх, меновала нових членох до Комисиї за запровадзованє поступку лицитованя и даваня державней польопривредней жеми под аренду и Комисиї за виробок Рочней програми защити, ушореня и хаснованя польопривредней жеми.
Одборнїки на вчерайшей схадзки дали и согласносц на одредзени кадрово пременки у школских одборох Ґимназиї „Сава Шуманович“ и Основней музичней школи „Филип Вишнїч“
