РУСКИ КЕРЕСТУР – Управни одбор (УО) Дому култури Руски Керестур на вчерайшей схадзки прилапел ребаланс финансийнохо плану за тот рок, насампредз пре тогорочну позарядову ситуацию з упокоєньом роботнїка Дому култури Юлияна Рамача Чаму.
З ребалансом зменшани средства хтори були опредзелєни за його плацу, у планє ураховани средства хтори Дом култури видвоєл за помоц фамелиї у случаю шмерци занятого, а на другим боку, од снователя – Општини Кула – за 300 000 динари звекшани средства за контракти о роботи о дїлу, односно гонорари фаховцох котри тераз превжали роботу з музичнима секциями у Доме култури.
На схадзки УО прилапени и финансийни звит о тогорочним Драмским мемориялє Петра Ризнича Дядї, спрам хторого цалосни приход бул 520 000 динари, а розходи 523 523 динари.
Драмски мемориял того року финансийно потримали Министерство култури Републики Сербиї з 200 000 дин., цо за 100 000 вецей як прешлого року, Национални совит Руснацох (120 000), Скупштини општини Кула (150 000) и Покраїнски секретарият за образованє, предписаня, управу и национални меншини-заєднїци (50 000) динари. Визначене же того року з Покраїнского секретарияту за културу и явне информованє за Драмски мемориял нє достати нїяки средства.