СТАРИ ЯНКОВЦИ/ВИНКОВЦИ (ГОРВАТСКА) – Всоботу и нєдзелю, 8. и 9. октобра, у Старих Янковцох и Винковцох отримани схадзки Шветовей ради Русинох/Руснацох/Лемкох (ШР РРЛ) и Шветового форуму младих (ШФМ) РРЛ, а члени тих форумох присуствовали и на манифестациї „Кед голубица лєцела”, всоботу отриманей у Петровцох.
Як Рутенпрес дознава од член ШР зоз Сербиї, предсидателя Рускей матки Дюру Папуґу, на схадзки ШР, под предшедованьом єй предсидателя Штефана Лявинца з Будапешту, присуствовали 9 з 10 членох Ради – з Мадярскей, Сербиї, Ческей, Словацкей, Польскей, України, Румуниї, представитель ШФМ и з Горватскей, а нє бул лєм член зоз Сиверней Америки.
На предкладанє подпредсидателя ШР Мию Шайтоша з Горватскей, прилапене же 14. Шветови конґрес (ШК) РРЛ у тей жеми, у Осиєку, будзе отримани од 29. юния по 2. юлий 2017. року, а єдно зоз заключеньох и же делеґация ШР пошвидко нащиви Министерство школства у Словацкей пре конкретну догварку о отвераню Оддзелєня за основни и мастер студиї русинистику на Катеди за етнолоґию и фолклористику Филозофского факултету у Нїтри.
Як гварел Папуґа, до конца того рока шицки членїци-орґанизациї ШК РРЛ можу посилац конкретни предлоги за пременки Статуту ШК, алє маю обовязку послац и службени документ о реґистрованю своїх орґанизацийох у жемох дзе робя, на чим ШР инсистує, понеже и то будзе унєшене до Статуту.
На схадзки ШФМ РРЛ, под предшедованьом Светлани Петрецки з Румуниї, визначене же плановани активносци Форуму за прешли период сполнєти, гварел за Рутенпрес член того цела спред Форуму младих РМ Сербиї Борис Фейди.
Бешедоване и о планох за дальшу роботу, пременкох Статуту тей орґанизациї, а на ШФМ РРЛ млади научели и два народни шпиванки бачванских Руснацох – „Чия то заградка” и „Ша ми тадзи преходзели” и єдну з нїх заєднїцки виведли на програми „Кед голубица лєцела”.