Принєшени и одлуки вязани за национални меншини

автор сен
982 Опатрене

НОВИ САД – Вчера, 8. априла отримана схадзка Скупштини Автономней покраїни Войводини (АПВ), на хторей посланїки розправяли о 17 точкох дньового шору. Медзи иншим, принєшени одлуки значни за високошколске образованє на язикох националних меншинох-заєднїцох, як и за финансованє орґанизацийох националних меншинох.

Кед слово о образованю, посланїки принєсли одлуку о покладаню примацого испиту, односно испиту способносцох за упис на високошколску установу на язикох националних меншинох-заєднїцох. Тиж так, буду обезпечени средства за финансованє и софинансованє активносцох и проєктох у обласци основного и штреднього образованя.

Средства з буджету АПВ достаню орґани и орґанизациї дзе у службеним хаснованю язики и писма националних меншинох-националних заєднїцох, як и орґанизациї националних меншинох, односно заєднїцох..

На схадзки принєшена Покраїнска скупштинска одлука о снованю Биосенс-виглєдовацко-розвойного институту за информацийни технолоґиї биосистеми, а планує ше и реализовац Програму за смарт-специялизацию у виглєдованю и иновацийох у АПВ, за период од 2015. по 2020. рок.

Унапредзенє социялней защити на териториї Войводини будзе витворене прейґ окремней програми, одлучене на вчерайшей схадзки.

Окрем наведзених, на схадзки принєшени и одлуки о просторних планох подручох за окремни намени на териториї АПВ, окреме о еколоґийних доброх и защити животного штредку.

ПОВЯЗАНИ ТЕКСТИ