РУСКИ КЕРЕСТУР – З пригодну кратшу културно-уметнїцку програму и винчованками заменїка предсидателя Општини Кула Велибора Милоїчича и предсидателя Националного совиту (НС) Руснацох Славка Раца, Керестурци вчера, 18. януара, означели националне швето Руснацох у Сербиї.
Програма почала з гимну Сербиї „Боже правде” и шветочну шпиванку Руснацох „Браца Русини”, виривки з поеми Михала Рамача „Чукундїдов ошмих” интерпретовал Александер Мудри, а Хлопска шпивацка ґрупа Дому култури Руски Керестур, под руководительством Юлияна Рамача, одшпивала даскельо руски шпиванки. По програми бул коктел.
Привитуюци госцох и винчуюци швето, предсидатель НС Славко Рац на вчерайшей шветочносци наявел и акценти у роботи Националного совиту у тим року.
– Треба же бизме вєдно робели на освидомйованю наших родичох и дзецох о националней припадносци, усадзованю чувства гордосци на наш народ – гварел Рац и визначел же у наиходзацим периодзе приоритет будзе ришованє питаня музейней збирки, радия по руски, як и можлїве купованє, потим и ушоренє найстаршей хижи у Керестуре.
Спред локалней самоуправи швето Руснацох у Сербиї присутним повинчовал Велибор Милоїчич, котри обрацел повагу на значносц очуваня култури и традициї Руснацох. З тей нагоди похвалєл добре сотруднїцтво Керестурцох и Општини Кула та, як и на Централней преслави у Кули, виявел же у наиходзацим периодзе Општина будзе робиц на ришованю питаня квалитету води и у Руским Керестуре.
Попри спомнутих, на означованю националного швета Руснацох у Керестуре присуствовали и члени НС Руснацох и його одборох, предсидатель Вивершного одбору НС Желько Ковач, предсидателька Скупштини Општини Кула Снежана Мркаич, директорка Основней и штреднєй школи з домом школярох „Петро Кузмяк” Хелена Пашо Павлович, дзепоєдни члени Совиту Месней заєднїци (МЗ) и його предсидатель Владимир Олеяр, секретар МЗ Михайло Сабадош, о.д. директора Дому култури Владимир Малацко, представителє керестурскей парохиї, на чолє з парохом о. Михайлом Малацком, представительки манастирох, представителє месних подприємствох и велїх здруженьох, та други Керестурци.
