РУСКИ КЕРЕСТУР – З нагоди 9. манифестациї „Нїтки Меланиї Павлович”, на вчерайшей програми у Замку у Руским Керестуре, Ирина Папуґа нашим просвитним и културним творительом уручела припознаня хтори Дружтво за руски язик, литературу и културу запровадзело пред штирома роками.
Припознанє з меном „Осиф Фа, учитель”, хторе ше додзелює просвитним роботнїком, додзелєне дакедишньому секретарови керестурскей Школи и музичарови Владимирови Мученскийови, учительком велїх ґенерацийох Мариї Малацко и Наталиї Семан, та виховательки у керестурскей дзецинскей заградки Меланиї Семан.
Тото припознанє уручене и наставнїци и писательки Серафини Макаї и подобовому уметнїкови и педаґоґови Силвестерови Макайовим з Коцура, длугорочному редакторови у Заводзе за видаванє учебнїкох Славкови Сабови з Вербасу, а будзе придате и професорки педаґоґиї Леони (Лабош) Урошевич з Бачинцох и учительки и писательки Любици (Сеґеди) Фалц з Петровцох.
Припознанє з меном „Владимир Мирко Ґаднянски”, хторе ше додзелює новинаром и редактором, вчера уручене редакторки Еуфемиї Ґшвенґ з Вербасу, а будзе и новинарови и фото-репотерови Любомирови Дудашови з Керестура, та новинарови и редакторови Душанови Познановичови зоз Сримскей Митровици.
Припознанє з меном „Микола Скубан” з обласци театралней творчосци достали ґлумец Янко Рац з Керестура, а уручене є и театралним творительом и режисером Нади и Янкови Лендєровим з Вербасу, та режисерови Якимови Гардийови з Дюрдьова.
Припознанє „Витомир Бодянец” за популаризованє руского скарбу и музичней творчосци вчера уручене композиторови Славкови Загорянскийови з Бачинцох (Шиду), а будзе уручене и авторки и интерпретаторки Мирослави Даждиу и музичней редакторки Татяни Колєсар Ґвоїч.
Гелена Гафич Стойков на концу шветочносци валалскей Библиотеки подаровала три малюнки своїх шестрох Мариї Симунович, Феброни Чакан и свой.
