У дюрдьовскей ОШ „Йован Йованович Змай” од конца фебруара наставнїки зоз седем предметох почали тримац пририхтуюци годзини на котрих матурантох пририхтую за закончуюци испит. Годзини ше трима з мацеринского язика – з руского и сербского, з математики и зоз предметох за комбиновани тест – историї, хемиї, физики, биолоґиї и ґеоґрафиї.
Школяре осмих класох, як и руске оддзелєнє у Дюрдьове ше почали пририхтовац за закончуюци испит, а на приватни годзини школяре затераз нє планую ходзиц, бо обчекую же им пририхтуюци годзини у школи буду достаточни. Гоч резултати теста буду уплївовац на збирни резултат за упису до стреднєй школи, вони ше, голєм затераз, од того нє боя.
Того року матуранти зоз дюрдьовскей основней школи найзаинтересованши уписац ше до штреднєй Медицинскей – найчастейше дзивчата и до Електротехнїчней школи – за котру заинтересовани векшина хлапцох. Тоти два стреднї школи при матурантох у Дюрдьове найпопуларнєйши уж длугши час.
У осмей класи руского оддзелєня єст штверо школярох, збирки за пририхтованє испитох достали стредком фебруара, та ше теди озбильнєйше почали и пририхтовац. Зложни су и вєдно ходза на пририхтуюци годзини зоз шицких предметох. Дома ше почали рихтац за предмети котри найволя, а гваря же комбиновани тест, пре зложеносц, будзе найчежше научиц.
ЯК ШЕ ШКОЛЯРЕ ПРИРИХТУЮ
– Почала сом ше пририхтовац за испит з мацеринского, руского язика, бо ми ше видзи же го найлєгчейше научим, а комбиновани тест будзе найчежше пририхтац, бо є зложени. Любела бим ше уписац до Медицинскей школи у Новим Садзе, общи напрям, або на фармацию – гварела матурантка Мария Барна.
– Перше сом почала учиц хемию, бо ю любим и прето же пририхтуюци годзини зоз того предмету перши почали. Любим и математику и биолоґию, та ше наздавам же добре звладам и достанєм досц боди. Пририхтуєм ше и за испит з руского язика. Любела бим ше уписац до Медицинскей школи у Зренянину, напрям акушерство – гварела матурантка Тамара Чордаш.
– Збирки за пририхтованє зме почали хасновац и на порядних годзинох, та нам то олєгча ученє. Препатрела сом их и одлучела перше учиц руски язик, бо тота збирка найгрубша. Любела бим ше уписац на общи напрям у Медицинскей школи у Новим Садзе або у Зренянину – гварела матурантка Лидия Гарди.
– Найволїм хемию, та сом ю перше почал учиц, а рихтам и физику. Видзи ми ше же найлєгчейше научим руски язик, а найчежше ґеорґафию и историю. Любел бим ше уписац до Транспортней школи у Новим Садзе, напрям вожач – гварел Стефан Бесерминї.
Пририхтуюци годзини з руского язика почали з єдну годзину тижньово, алє вони буду интензивнєйши як ше будзе приблїжовац испит.
– Найволєл бим уписац Польопривредну школу у Футоґу. Кущик сом почал учиц за примаци испит и наздавам ше же будзем мац досц боди за упис, бо лєм ю наисце жадам уписац – гварел Михайло Скубан.
– Радзим ше зоз школярами кеди им найвецей одвитує же бизме ше рихтали за закончуюци испит з руского язика. Поряднє приходза, алє ше указало же як ше приблїжує пробни тест, вони вше поряднєйши и баржей уча. Задатки на примацим им буду цалком нєпознати, алє вежбаю зоз збиркох и видза яка система, яки би могли буц питаня, та маю вецей самодовирия – гварела Мария Самарджич, наставнїца руского язика.
КОМПЕТЕНТНИ О ЗАКОНЧУЮЦИМ ИСПИТУ
На инициятиву Мариї Тртич, директорки школи, матуранти буду робиц тест „Як примаш информацию” котри им обраци увагу на тото же найзначнєйше перше добре пречитац текст у тесту пред тим як почню ришовац задатки.
– Школяре би требали поряднє ходзиц на пририхтуюци годзини, бо им наставнїки можу олєгчац ученє и вельо помогнуц. Медзитим, нє сотрудзую шицки школяре и то чкода, бо препущую нагоду лєпше ше пририхтац за тот значни испит. Пробни закончуюци испит будзе 16. априла, та школяре годни видзиц як то будзе випатрац на дзень покладаня. Дюрдьовска основна школа таки тест уведла даскельо роки пред тим як го Министерство образованя дало як обовязну праксу у школох – гварела Мария Тртич директорка дюрдьовскей ОШ.
А цо о таким тестованю школярох дума школски педаґоґ Вукица Петрович, вона гвари:
– Покладанє закончуюцого испиту з телїх предметох за дзеци барз вельке обтерхованє, окреме прето же питаня нєпознати. Школяре новших ґенерацийох маю меншу трему и опущенши су як ґенерациї котри упис до стреднєй школи покладали на иншаки способ. Вони вообще нє маю мотивацию, а стан у дружтве и факт же чежко найсц роботу, сиґурно уплївує и на нїх. 
Нажаль, найважнєйше им достац боди на испиту, як знанє зоз того предмету, котре нєшка у дружтве нє ма адекватну вредносц. Пририхтованє им олєгчую наставнїки котри у нашей школи запровадзую пририхтуюци годзини зоз шицких предметох зоз закончуюцого испиту. Позитивне же даєдни з нїх на тих годзинох формую ґрупи на основи знаня школярох, та у цеку пририхтованя можу напредовац и прейсц до напреднєйшей ґрупи – гварела Петрович.
Упис до погришней школи може неґативно уплївовац на школяра, гварела школски психолоґ Соня Шанта. На вибор школи уплївую вецей фактори, як наприклад резултати теста, думанє родичох, блїзкосц школи пре економски стан и зоз котру закончену школу школяре найлєгчейше найду роботу.
– Матуранти у рокох у котрих им барз значне друженє зоз пайташами. Пририхтую ше и уча, алє сом нє сиґурна чи су цалком свидоми же им тот испит одредзує будучносц. По Велькей ноци буду робиц тест професийней ориєнтациї котри ше состої зоз теста схопносцох, особносци и фахових интересованьох. По їх анализованю, укаже ше же яка робота и котри школи им одвитую. Тестиранє будзе ґрупне, а совитованє индивидуалне, дзе можу присц и родичи. Матуранти ше приходза совитовац ґу мнє, нє сиґурни су ище цо би любели уписац, та любя чуц думанє, а пририхтованє як цо програма професийней ориєнтациї им у тим може лєм помогнуц – гварела школски психолоґ Соня Шанта.
У дюрдьовскей ОШ пририхтуюци годзини з историї буду кажди пондзелок, зоз физики кажди други пондзелок, хемиї кажди пияток, ґеоґрафиї раз до мешаца, а з математики, биолоґиї и руского язика по догварки зоз школярами.
ТЕСТ ПРОФЕСИЙНЕЙ ОРИЄНТАЦИЇ
Од 2011. року школяре дюрдьовскей ОШ маю значну потримовку за вибор стреднєй школи. Слово о програми професийней ориєнтациї на котру ходза школяре седмей и осмей класи, а котра ма задаток порихтац их же би лєгчейше вибрали школу котра им одвитує. Школяре ше освидомюю, нащивюю школи, упознаваю ше зоз напрямами, професиями и стретаю ше зоз фаховцами рижних професийох. Резултат тесту, котри анализує школски психолоґ, дава предклад о професиї по схопносцох, особеносци и интересованьох, котри би нє требало занєдзбац.
ЗАКОНЧУЮЦИ ИСПИТ БУДЗЕ СТРЕДКОМ ЮНИЯ
Матуранти закончуюци испит буду покладац три днї у юнию: – 15. мацерински язик; – 16. математику и 17. комбиновани тест. На основи успиху у ОШ годни достац максимално 70 боди, а на закончуюцим испиту вукупно 30 боди. Додатни боди школяре годни достац на основи посцигнутих резултатох на медзинародних и републичних змаганьох у осмей класи. Прелиминарни резултати буду обявени 19. юния, а конєчни 25, кед школяре буду пополньовац лїстину школох до котрих ше жадаю уписац. Шицки информациї о упису до стреднїх школох и малей матури у Сербиї мож ше поинформовац на урядовим сайту srednjeskole.edukacija.rs.