РУСКИ КЕРЕСТУР – Пририхтованя за тогорочни 55. Фестивал рускей култури „Червена ружа”, хтори у Руским Керестуре будзе од од 24. по 26. юний, предлужени и з вчерайшу схадзку Орґанизацийного одбору у керестурским Доме култури, на хторей бешедоване о уж познатих, як и дзепоєдних нових детальох програмох манифестацийох и технїчно-орґанизацийней часци найвекшого и найстаршого Фестивалу Руснацох на тих просторох.
Перши два днї, 24. и 25. юния, програми „Ружи” буду на отвореней сцени у дворе Школи „Петро Кузмяк”, а на нєдзелю, 26. юния, манифестация „Червена ружа” будзе у Велькей сали Дому култури. Як поведзене на вчерайшей схадзки, на „Червеним пупчу” найвироятнєйше буду виведзени медзи 10 и 12 нови композициї за дзеци, а попри програми на бини, за дзеци буду орґанизовани и креативни роботнї коло сцени, як и розвага з диском после програми – у физкултурней сали, под час манифестациї „Одгуки ровнїни”.
Спомнута манифестация на пияток, 24. юния почнє на 21 г., на нєй буду участвовац музично-танєчни ансамбли КУД з наших местох, а буду ю водзиц нашо познати ґлумци-гумористи.
Окреме богати дзень будзе на соботу, 25. юния, кеди буду и два провадзаци манифестациї – Керестурски саям (у дворе Майсторского дому и коло нього), та Медзинародни турнир у одбойки у Спортскей гали. Можлїве же на соботу у Спортскей гали будзе ище єдно спортске змаганє – особох з почежкосцами у розвою.
Всоботу вечар на отвореней сцени будзе Шветочни концерт, а тих дньох окремна комисия почнє обиходзиц нашо КУД-и пре вибор репрезентативних точкох за ткв. „Руски блок” на Концерту. Того року на „Ружи” нє будзе госцовац ансамбл з иножемства, алє єден реномовани домашнї (пошвидко будзе познате хтори), а на Орґанизацийним одборе предложене же би иножемни ансамбл на Фестивалє госцовал кажди други рок. Потвердзене же у трецей часци вечаршей програми наступи познати тамбурови оркестер „Равница” зоз Суботици, и то на меншей бини у дворе Школи, у просторе за розвагу.
За традицийни награди „Червеней ружи” на нєдзелю, 26. юния, буду ше змагац вецей як 10 млади шпиваче з вецей наших местох, а програма будзе осучаснєна у часци їх наявйованя. По схадзку Програмного одбору, концом мая, будзе познати и автор вистави на тоготрочним Фестивалє, як и учашнїк ревиялней часци нєдзельовей манифестациї, а предложене же би ше змаганє нових забавних композицийох отримовало кажди други рок, так же, практично, конкурс за композициї отворени два роки.
После каждей манифестациї за учашнїкох и нащивительох „Ружи” у школским дворе под двома шатрами будзе розвага з музику, а всоботу будзе варени и паприґаш у вецей котлох, гварене на схадзки Орґанизацийного одбору. Тоту провадзацу часц Фестивал орґанизує вєдно з Младежску орґанизацию „Пакт Рутенорум”.
