БИКИЧ – Вовторок, 11. октобра, Бикич нащивели заменїк предсидателя Националного совиту Руснацох (НС) Йовґен Мудри, подпредсидателька НС Наташа Еделински Миколка, о.д. директора Заводу за културу войводянских Руснацох Ивана Дудаш и началнїк Општинскей управи Шид Ромко Папуґа, дзе з домашнїма бешедовали о пририхтованьох за Централну преславу националного швета Руснацох, нарок 14. януара у Бикичу и Шидзе – преноши РТВ Войводини звит свойого дописователя зоз шидскей општини Венямина Бульчика.
На сходзе констатоване же пририхтованя за тоту подїю иду як плановане, насампредз на видаваню Моноґрафиї о Бикичу, як и за участвованє домашнїх на Шветочней академиї, а Ромко Папуґа присутних поинформовал же идуцого тижня почню и роботи на ушореню Дому култури у Бикичу.
На схадзки тиж поведзене же уводне слово за Моноґрафию о Бикичу напише Мирон Жирош, а рецензию академик Микола Мушинка.