РУСКИ КЕРЕСТУР – Початком мая, по наступних шветох, мала би буц позната конкретнєйша програма манифестацийох тогорочного 55. Фестивалу рускей култури „Червена ружа”, хтора будзе винєшена на схадзки Орґанизацийного одбору 5. мая, заключене на вчерайшей схадзки Програмного одбору Фестивалу.
Як познате, „Ружа” у Руским Керестуре того року будзе од 24. по 26. юний, а на Програмним одборе винєшене же на „Червеним пупчу” буду виведзени коло 10 нови композициї за дзеци, тих дньох до наших КУД-ох буду послати прияви за участвованє дзецинских ансамблох на „Пупчу”, алє и за нову-стару манифестацию Фестивалу „Одгуки ровнїни”.
На „Одгукох ровнїни” буду участвовац музично-танєчни ансамбли з наших местох з програму до 10 минути, а буду поволани и нашо ансамбли за ткв. „руски блок” на Шветочним концерту, други дзень Фестивалу. Як вчера порадзене, точки опатри и фахова комисия хтора менована на Одборе за културу Националного совиту.
По схадзку Орґанизацийного одбору би мало буц познате и мено госцуюцого ансамблу – иножемного, чи зоз Сербиї, а уж познате же на Естрадним концерту всоботу, 25. юния, наступи познати тамбурашски ансамбл „Равница” зоз Суботици.
До конца априла тирва приявйованє младих шпивачох за найкрасши глас, а понеже нє будзе змаганє нових забавних композицийох, на Програмним одборе предложени даскельо идеї за ревиялну часц традицийней манифестациї Фестивалу „Червена ружа”, цо тиж будзе познате по схадзку Орґанизацийного одбору.
Ище скорей утвердзене же под час „Ружи” будзе Медзинародни турнир у одбойки, Керестурски саям, а того року и преширени змисти за розвагу после програмох у дворе Школи „Петро Кузмяк”.
