НОВИ САД – Вивершни одбор (ВО) Националного совиту (НС) Руснацох на нєшкайшей порядней схадзки будзе розпатрац вецей точки хтори би мали буц на дньовим шоре шлїдуюцей схадзки НС. Схадзка ВО нєшка будзе на 13 годзин у Заводзе за културу войводянских Руснацох (ВР) у Новим Садзе.
Як пририхтованє за шлїдуюцу схадзку НС, хтору плановане отримац 5. децембра, ВО нєшка, медзи иншим, будзе бешедовац о предкладаню Плану роботи и Финансийним плану Совиту за 2016. рок, як и о починаню явней розправи о додзельованю припознаньох визначним Руснацом за їх доприношенє рускому народу.
На основи предложеного дньового шору на нєшкайшей схадзки ВО, за наступну порядну схадзку НС Руснацох будзе предложенє и даванє думаня о Финансийним плану и Плану роботи Заводу за културу ВР, будзе бешеди о предкладаню членох до Управного и Надпатраюцого одбору Заводу, як и менованє членох Управного и Надпатраюцого одбору Руского народного театру „Петро Ризнич Дядя”.