Пририхтованє за ювилей РКЦ

автор саб
922 Опатрене

НОВИ САД – Представителє Националного совиту (НС) Руснацох, у рамикох нащивох своїм локалним подручним канцеларийом, вчера були у Новим Садзе, дзе бешедоване о актуалних обставинох у руским културним живоце у тим городзе.

Кед слово о Подручней канцелариї НС у Новим Садзе, главна активносц тераз будзе пририхтованє и орґанизованє Шветочного концерту и преслави з нагоди 70-рочнїци снованя нєшкайшого Руского културного центру (РКЦ), хтори буду 19. и 20. новембра. Попри тим, Новосадянє поряднє участвую на шицких руских манифестацийох, а як окреме добра инициятива визначени организовани превоз дзецох з рижних часцох городу на проби у РКЦ.

Знова визначени проблем просторийох РКЦ и Подручней канцелариї, односно отримованя будинку Матки, а дати и зауваги на систему финансованя културних активносцох, понеже Драмски студио РКЦ, хтори остатнї сезони вельо и добре роби, того року нє достал потримовку НС Руснацох.

На вчерайшим сходзе у просторийох РКЦ були директорка Центру и координатюорка Подручней канцелариї НС Руснацох у Новим Садзе Наташа Макаї Мудрох, члени Канцелариї задлужени за обласц култури Миломир Шайтош и за право на службене хаснованє язика и писма Боґдан Рац, як и Владимир Сивч з РКЦ, а спред НС предсидатель Вивершного одбору Желько Ковач и секретар Совиту Таня Арва Планчак.

1-NS-RKC-02

ПОВЯЗАНИ ТЕКСТИ