СЕРБИЯ – Термин за приявйованє за ваучери за одпочивок у Сербиї предлужени зоз 15. юлия на 15. октобер, та гражданє маю ище три мешаци за конкурованє и достац ваучер од 5 000 динари за змесценє у даєдней туристичней дестинациї, пише Блиц.
Од 100 000 гражданох, келї маю право на попусти за лєтованє у Сербиї, за доставанє ваучерох ше приявело лєм 4 000, а 60 одсто приявених пензионере.
Ваучери годно хасновац од 15. авґуста по 15. новембер, а як гварел министер тарґовини, туризму и телекомуникацийох Расим Ляїч, циль Министерства предлужиц туристичну сезону на октобер и новембер, понеже то „найкритичнєйши мешаци за туризем“.
Ваучер годно хасновац у 243-ох погосцительних обєктох у Сербиї, а список мож опатриц на сайту Министерства тарґовини, туризму и телекомуникацийох https://mtt.gov.rs/