НОВИ САД – На основи записнїкох хтори направели контролоре у городских автобусох у Новим Садзе, комунална полиция од юния дотераз виписала 331 потупююцу прияву за особи котри ше „шверцовали” у автобусох, пише 021.
З Городского транспортного подприємства гверели же прияву од комуналней полициї достала половка особох котри лапени же ше у городских автобусох вожа без карти.
– Прешлого мешаца окремну карту, хтора кошта 1 650 динари, плацела половка путнїкох котри нє мали при себе карту, а гевтим котри нє виплацели, написани записнїки и потим су прешлїдзени до комуналней полициї – гварели з городского превожнїка.
Концом прешлого рока Город Нови Сад принєсол Одлуку по хторей до автобусох можу уходзиц комунални полицає и помагац контролором, котри нє службени особи, та нє можу питац особни документи.
Кажде хто нє ма карту у автобусу, а нє сце ю виплациц, достанє потупююцу кару же би плацели 6 000 динари. Як и дотераз, хто виплаци за осем днї, сума ше зменшує на поли.