НОВИ САД – Подпредсидателька Скупштини АП Войводини Ана Томанова Маканова вчера, 10. новембра, прияла делеґацию Рускей матки (РМ), у хторей були предсидатель РМ Дюра Папуґа, заменїк предсидателя Миломир Шайтош и портпарол РМ проф. др Михайло Фейса.
У длугшей и отвореней розгварки члени делеґациї РМ Маканову Томанову упознали з функцию и роботу Матки медзи Руснацами у Войводини и Сербиї, як и з успихами хтори РМ посцигла на медзидержавним уровню у очуваню самостойного идентитету Руснацох, насампредз през роботу и у Шветовим Конґресу Русинох/Руснацох/Лемкох.
Основна причина приєму у Скупштини Войводини була означованє наиходзацого ювилею – 25-рочнїци обновеного дїлованя Рускей матки медзи Руснацами на тих просторох, так же на концу розгварки делеґация РМ представительох войводянскей Скупштини поволала на означованє ювилею, цо дзечнє прилапане.
Подпредсидательки Скупштини Войводини Ани Томановей Макановей представителє РМ вчера винєсли и свойо нєзадовольство зоз сотруднїцтвом Матки и Националним совитом Руснацох и Заводом за културу войводянских Руснацох, односно з одлуками и справованьом найузшого руководства тих институцийох, хтори, по думаню чолних людзох Рускей матки – нє рационални и нє у складзе зоз сучасносцу, кед у питаню национални идентитет Руснацох.
Попри з другима институциями, делеґация Рускей матки ше у наступним периодзе планує стретнуц и з представителями Влади и Скупштини Републики Сербиї.