НОВИ САД – У Городскей хижи у Новим Садзе вчера орґанизовани приєм за найлєпшу сербску атлетичарку Ивану Шпанович, а винчуюци єй на тогорочних посцигнутих резултатох, городоначалнїк Милош Вучевич визначел же Ивана и єй робота драгоказ младим и шицким котри веря до правих вредносцох и котри ше боря за лєпшу Сербию.
– Дзекуєм Ивани и єй тиму на вельких успихох, а Нови Сад ше намага помогнуц єй кельо може, же би єй було олєгчане тренированє. Велька ствар мац за согражданку Ивану Шпанович и тренера як цо то Ґоран Обрадович – гварел на вчерайшим приєму Вучевич.
Ивана Шпанович виявела же єй дакус жаль пре нєосвоєне злато на Олимпияди у Рию, алє понеже тот рок заокружела зоз златом на Европским першенстве, стриблом на Шветовим, бронзу на Олимпияди и освойованьом Диямантскей лиґи, заключела же то бул найуспишнєйши рок у єй кариєри.
Шлїдуюци наступ на даєдним вельким змаганю Ивани Шпанович будзе на Европским першенстве у атлетики у Беоґрадзе, у марцу 2017. року.