РУСКИ КЕРЕСТУР – Роботнїки подприємства „Слован” зоз Селенчи вчера докончовали обиванє турнї на Катедралней церкви св. оца Миколая у Руским Керестуре, а роботи на турнї почали початком прешлого тижня, кеди дзвигани скели.
З турнї доокола обита фасада и малтер, та шлїдзи малтерованє и билєнє з наквалитетнєйшима материялами, пре елиминованє влаги хтора у значней часци залапела мури катедрали.
За тоти роботи парохия обезпечела 400 000 динари од держави, а того року коло 90 000 од прилогох керестурских парохиянох.
Ище прешлого тижня докончена єдна часц роботох у олтаре церкви, дзе по уводзеню новей електричней инсталациї омалтеровани мури, а идуцого тижня ше их планує обилїц и покласц реставровани образи. За тельо єст пенєжи з подарованих двох гольтох жеми, а док ше знова назбера средства, планує ше омальовац мури у святилїщу.
Шицки роботи на вицагованю влаги з мурох Катедралней церкви, хтори почали прешлого року, буду окончовани фазно, у складзе з обезпечованьом средствох з рижних жридлох.