СЛОВАЦКА – Як информує службени сайт Министерства школства, науки и спорту Словацкей Републики, а преноши lem.fm, 11. юлия при спомнутим министерстве основана Роботна ґрупа за образованє на русинским язику, хтору будзе водзиц державни секретар того министерства (Русин) Петро Крайняк. На першей схадзки Роботней ґрупи присуствовал и министер школства Словацкей Петер Плавчан.
Ґрупа основана пре запровадзованє Концепциї (Акцийного плану) за розвой виучованя русинского язика и култури на предшколским уровню и у основних и штреднїх школох у Словацкей, а на тим сходзе спатрени 13 теми хтори би мали буц перши ришовани.
Як гварел Петро Крайняк, предложене же би и русински просвитни роботнїки основали свой союз, як цо то уж маю други народносци, а медзи визначенима проблемами у образованю на русинским язику то политика учебнїкох, нєдостаток школярох, сотруднїцтво з руководителями школох, мотивация и информованосц школярох о виучованю русинского язика, а бешедоване и о можлївосци преквалификованя наставнїкох русийского, лєбо українского язика, за преподаванє по русински.
Членїца Роботней ґрупи доцентка др Ана Плишкова з Прешовского универзитету гварела же ище 1996. року виробена Концепция (Акцийни план) за виучованє русинского язика на шицких уровньох, и гоч є прилапена у компетентним Министерстве – дотераз є нє витворена, та наглашела потребу же би державни орґани мали контроловац сполньованє Плану.
За предсидателя Роботней ґрупи вибрани мр Марек Ґай, а за членох спомнута Плишкова, др Люба Кральова (зоз Здруженя „Колїсочка”), представителє ОШ – мр Милош Стрончек (Свиднїк), др Марцела Рунянинова (Кална Розтока), мр Моника Сирикова (Чабини), мр Ивета Мелничакова (Медзилаборци), як и др Кветослава Копорова з Прешовского универзитету, мр Ана Кузмякова спред Русинскей оброди Словацкей, та мр Владимира Палфийова и др Ана Бемерова спред Оддзелєня за школство Прешовского самоуправного краю.
