Проблеми у применьованю нових здравствених карточкох

автор сен
980 Опатрене

БЕОҐРАД – Гоч термин за замену паперових здравствених карточкох за електронски, чиповани виходзи 31. децембра, у Сербиї лєм трецина осиґуранїкох ма нову карточку. На основи дотерашнєй пракси, защитнїк гражданох Саша Янкович спозорел же у задравствених установох уж єст вецей проблеми у хаснованю тих карточкох и послал допис ресорному министерству и Републичному фонду за здравствене осиґуранє.

Карточки нє маю податки о числу здравственого картону, о спозореню на реакцию на  одредзени лїк, лєбо вакцину, анї реґистрацийне число роботодавателя. Ґу тому, защитнїк гражданох спозорел же велї доми здравя нєдостаточно опремени з читачами карточкох и нє маю одвитуюцу технолоґию.

У допису Янкович наведол и приклади же дзепоєдни пациєнти з нову карточку зоз собу муша ношиц и стару кнїжочку, на хторей пише число задравственого картону.  Дзепоєдни здравствени установи на нову карточку кладу налїпку з числом картону, та єст пациєнтох з вецей налїпками – за картон при лїкарови общей пракси, зубарови, ґинеколоґови, итд.

На основи дотерашнїх податкох, вироятно же по 31. децембер нє шицки гражданє сцигню направиц нову карточку, та постої опасносц же вельке число пациєнтох нє годно достац одвитуюце медицинске допатранє, анї рецепти за лїки. Як оценєл Янкович, найзагроженша популация стари особи, котри и найчисленши  хаснователє порядних терапийох, односно лїкох.

ПОВЯЗАНИ ТЕКСТИ