КОЦУР – Провадзаци програми Фестивалу фолклору Руснацох „Коцурска жатва” всоботу, 16. юлия, отримани у физкултурней сали ОШ „Братство єдинство”, дзе пририхтана вистава старих народних облєчивох и других експонатох зоз скарбу домашнього Етно-клубу „Одняте од забуца”, промоция кнїжки „Народне облєчиво и танци бачко-сримских Руснацох” и Етно-столи.
На Вистави було виложене хлопске и женске облєчиво за розлични нагоди, дзе найстарше, як познате, з 1905. року, а о виложених експонатох бешедовала предсидателька Етно-клубу Аранка Медєши.
О кнїжки „Народне облєчиво и танци бачко-сримских Руснацох”, у виданю Заводу за културу войводянских Руснацох, бешедовали хореоґрафе Микола Ґубаш и Йоаким Рац Мими и директор Заводу за културу войводянских Руснацох Серґей Тамаш, а на презентациї члени КУД „Жатва” були пооблєкани до руского народного облєчива.
На концу тей часци програми госци могли коштовац єдла з Етно-столох, хтори за тоту нагоду пририхтали членїци Активу женох КУД „Жатва”. Шицких привитала предсидателька Активу Коцана Колєсар Вукобратович, котра накратко потолковала и як ше дакеди кошело жито, яки єдла ше ношело на польо, та хтори єдла пририхтани и виложени на Етно-столох.