БЕОҐРАД – Канцелария за людски и меншински права Влади Републики Сербиї вчера у Беоґрадзе отримала схадзку з представителями националних совитох (НС) националних меншинох у Сербиї и Покраїнского секретарияту за образованє, предписаня, управу и национални меншини-заєднїци, на хторей представени концепт методолоґиї провадзеня и информованя о запровадзованю Акцийного плану (АП) за витворйованє правох националних меншинох. Концепт виробени у сотруднїцтве з твининґ-проєктом „Потримовка унапредзеню людских правох и нулта толеранция за дискриминацию”, хтори финансовала ЕУ – сообщене вчера з Канцелариї. Спред Националного совиту Руснацох на схадзки присуствовал його предсидатель Славко Рац.
З прилапйованьом Акцийного плану 3. марца того року предвидзене же його запровадзованє провадзи Совит за национални меншини, хторому Канцелария дава фахову и административно-технїчну потримовку. Тиж так, обовязна є квартално зазберовац податки о витворйованю активносцох з Акцийного плану, правиц звити о його запровадзованю и доручовац их Совиту за национални меншини и Координациї националних совитох националних меншинох. Пре провадзенє реализованя Акцийного плану у вязи з прегваряцким Поглавйом 23, звити ше будзе давац и Совиту за запровадзованє Акцийного плану за спомнуте поглавє.
На вчерайшей схадзки директорка Канцелариї за людски и меншински права Сузана Паунович визначела же Влада Сербиї пошвецена провадзеню АП за меншини и же у наступним периодзе будзе основани тим хтори будзе зберац податки и робиц на вирабяню звитох. У планє и обука особох котри буду давац звити о активносцох з АП и Канцелариї доручовац нєобходни податки.
Як после вчерайшей схадзки за Рутенпрес гварел предсидатель НС Руснацох Славко Рац, представительом Совитох подзелєни формулари за звити, а у каждим, та и нашим Совиту, вироятно буду одредзени особи котри буду задлужени за даванє звитох о активносцох з Акцийного плану. Перши таки звит маю доручиц по 20. авґуст.
Схадзка з представителями НС-ох и ресорного покраїнского секретарияту отримана после розгваркох Канцелариї з шефицу Прегваряцкого тиму за водзенє прегваркох о приступаню Сербиї ґу ЕУ Таню Мищевич, з представителями державних орґанох, медзинародних орґанизацийох и з Делеґацию ЕУ у Сербиї – сообщене вчера з Канцелариї.