КУЛА – Националне швето Руснацох вчера шветочно преславене и у руским КУД „Др Гавриїл Костельник”, дзе тиж и Подручна канцелария Националного совиту Руснацох, з пригодну програму у хторей наглашка була на рускей литератури.
Шветочносц почала з интонованьом державней гимни и шветочней шпиванки Руснацох у Сербиї, а потим у мено домашнїх шицких присутних привитал предсидатель Дружтва Владимир Бучко, хтори повинчовал Швето.
Пригодни текст о Руснацох у Сербиї на сербским язику пречитала Амалия Ковач хтора була и модератор програми. У културней часци наглашка була на рускей литератури та ше зоз своїма творами кратко представели писатель Янко Павлович зоз Вербасу и домашня Мелания Арваї, а у музичней Мишана шпивацка ґрупа Дружтва и шпиваче, солиста Дюра Грубеня и дует Амалия и Ярослав Ковачово под руководзеньом Еуфемиї Планкош.
Домашнї з тей нагоди пририхтали и виставу кнїжкох на руским язику, рижних жанрох и видавательох, хтори власносц їх Дружтва.
На шветочносци, попри членох Дружтва старшей и наймладшей ґенерациї и їх фахових сотруднїкох, бул и представнїк Националного совиту Руснацох Желько Ковач, предсидатель Рускей Матки Дюра Папуґа и представителє кулского КУД „Дурмитор”.
