РУСКИ КЕРЕСТУР – З нагоди Школскей слави дня Св. Сави, хтора того року пада внєдзелю, 27. януара, шветочна програма вчера отримана у голу Основней и штреднєй школи зоз домом школярох „Петро Кузмяк”.
На початку обряд пошвецаня славского колача першираз окончели священїки Сербскей православней церкви зоз парохиї у Кули, о. Борислав Тошич, о. Владислав Паїч и диякон Петар Николич, а кумове слави були троме школяре штреднєй школи.
На програми бул присутни и парох грекокатолїцкей парохиї у Керестуре о. Михайло Малацко, наставнїки школи и школяре, хтори потим провадзели и шветочну програму котра почала зоз святосавску гимну.
У програми на руским и сербским язику, школяре основней и штреднєй школи представели найважнєйши подїї зоз живота св. Сави през пригодни тексти, рецитал и леґенди.
У музичней часци наступели шпивачки штреднєй школи як и ґрупа школярох на гармоникох и тамбурох з керестурского оддзелєня Школи за основне музичне образованє. Шицких учашнїкох пририхтали наставнїки Мария Балїнт, Мелания Рамач и Мирон Сивч, а координаторка програми була Невенка Пєщич.
