НОВИ САД – Медзинародна Манифестация „Ноц виглєдовачох” на ютре, 25. септембра, слави дзешати родзени дзень, а у Новим Садзе з тей нагоди у Тарґовецким центре „БИҐ” и у Клубу „The Quarter” буду отримани рижни змисти за шицких заинтересованих.
Од 16 до 22 годзин у „БИҐ”-у будзе друженє з науковцами, штредньошколцами и основношколцами, котри нащивительом представя свойо иновациї, а нащивителє вецей дознаю и о историї дзепоєдних одкрицох.
Друга часц програми будзе у Клубу „The Quarter”, дзе пририхтане преподаванє, вистава „You say light – I think Shadow“ („Ти гвариш шветлосц – Я думам цинь”), авторкох Александри Стратимирович и Сандри Праун, а потим будзе грац бенд „Либертанґо”.
На 22 годзин почнє Паб-наукови квиз, у хторим нащивителє годни превериц свойо знанє з науки, после чого будзе музика и змаганє науковцох у шпиваню, наявели орґанизаторе.