СЕРБИЯ – Нєшка у школох чийо роботнїки штрайкую нє будзе настави, як протест пре зменшани плаци, бо просвитним роботнїком котри штрайкую фебруарски плаци зменшани за до 33 одсто. Синдикати твердза же у законє нє пише же просвитним роботнїком мож зменшац плаци.
Министер просвити Срдян Вербич твердзи иншак и ище прешли тидзень наложел директором школох же би зменшали плаци роботнїком котри под час штрайку тримали скрацени годзини.
З Униї синдикатох просвитних роботнїкох Сербиї и Синдикату роботнїкох у просвити Сербиї поручели же предлужа штрайковац з минималним роботним часом. Наявели же кед плаца и идуци мешац будзе зменшана, штрайк буду радикализовац.
На протесту хтори отримали 17. марца у Беоґрадзе, просвитни роботнїки з двох спомнутих синдикатох вимагали и же би ше отримало позарядову схадзку Скупштини Сербиї, на хторей ше будзе бешедовац о стану у образованю.