БЕОҐРАД – Два синдикати просвитних роботнїкох хтори нє подписали Спорозуменє о претаргованю штрайку за нєшка наявели протест у Беоґрадзе, а понеже Министерство просвити принєсло одлуку о зменшованю плацох роботнїком котри штрайкую, вони наявели радикализацию протесту. У школох у хторих ше штрайкує нєшка нє будзе настави, а просвитни роботнїки руша до протестного шпациру од Народней скупштини по Владу Сербиї.
Здруженє директорох школох вимага од министра Вербича же би поцагнул одлуку по хторей ше просвитним роботнїком хтори штрайкую будзе зменшовац плаци, прето же то нє по закону, та би просвитни роботнїки могли тужиц державу, преноши РТВ.
Уния синдикатох просвитних роботнїкох Сербиї и Синдикат роботнїкох у просвити Сербиї нє подписали Спорозуменє прето же вимагаю дополнююци ґаранциї, а нєшка точно штири мешаци як почал штрайк просвитних роботнїкох. Тоти два синдикати вимагаю же би министер Вербич по 21. марец прецизовал кеди би ше виплацовало материялну помоц просвитним роботнїком хтора обецана у Спорозуменю и о якей суми слово.
Кед вимоги просвитних роботнїкох нє буду сполнєти, вони наявели же вецей нє буду тримац дополнююци годзини, а же конєц школского рока будзе под знаком питаня.