МИКЛОШЕВЦИ – Проєкт наводньованя зоз средствох Европскей униї ИРРИ, хтори влонї запровадзени и на полю фамелийного польопривредного ґаздовство Желька Лїкара у Миклошевцох, як єдним з тринац демонстарцийних польох у општинох Ловас и Томповци, вошол медзи три найуспишнєйши у Горватскей.
Министерство реґионалного розвою и фонди Европскей униї порушали Вибор за найуспишнєйши локални ЕУ-проєкт у Републики Горватскей у чаше од 2012. по 2014. рок, пре промоцию тих проєктох зоз средствох Европскей униї. Були облапени проєкти з рижних обласцох и оценьована 21 програма у цалей Горватскей.
З тей нагоди, як єдного з хасновательох спомнутого проєкту, ТВ-екипа Министерства за реґионални розвой и фонди Европскей униї Републики Горватскей вчера нащивела Желька Лїкара и його ґаздовство у Миклошевцох, и зняли авдио-визуелни материял хтори будзе приказани на додзельованю наградох у маю того року у Заґребе.
Проєкт наводньованя ИРРИ порушани пре злєпшанє и звекшанє продукциї польопривредних културох, а його хаснователє достали потребну опрему за наводньованє и одслухали теорийни преподаваня о єй хаснованю.