НОВИ САД – Покраїнски секретар за финансиї Зоран Радоман спозорел вчера же буджет Войводини шлїдуюцого року будзе найменши од приношеня Уставу 2006 року.
Радоман оценєл же Фискална стратеґия за идуци рок, хтору Влада Сербиї нєдавно прилапела, кулминация одбераня пенєжу од Войводини.
Вон гварел и же Покраїнска влада даскельо раз пробовала иницировац приношенє Закона о финансованю Войводини.
– И попри наяви министра финансийох же нарис закончени и же идзе на явну розправу, нїч ше нє збуло. Предлужує ше нєзаконїте и процивуставне финансованє Войводини, хторе кажди рок Войводяном твори менєй пенєжи у каси и менєй як цо то уставна обовязка – гварел Радоман.
Вон потолковал же спрам Фискалней стратеґиї Влади Сербиї буджет Войводини будзе очкодовани за вецей як 40 милиярди динари.
Радоман додал же пре таку ситуацию Покранїска влада нє годна у полней мири финансовац инфраструктурни проєкти, же менєй достаню установи култури, орґанизациї цивилного дружтва, спортски орґанизациї.