НОВИ САД – По податкох Городскей виберанковей комисиї, на подручу Городу Нови Сад гласали коло 55 одсто з 324 000 уписаних до Общого виберацкого списку, односно 177 791 граждан Нового Саду. На основи обробеного материялу зоз 190 од 197 гласацких местох у городзе и пригородских населєньох, лїстина „Александар Вучич-Сербия победзує” достала 40,24 одсто гласи, цо значи же будзе мац 38 од 78 мандатох у Скупштини Городу Нови Сад.
Лїстина „Досц було-Саша Радулович” у Новим Садзе витворела вельки успих, понеже достала 9,77 одсто гласи, односно осем мандати у городскей Скупштини. На трецим месце лїстина „Др Воїслав Шешель-Сербска радикална странка”, за хтору гласали 8,51 одсто гласаче, цо радикалом ноши осем мандати, а на штвартим месце лїстина „Ивица Дачич-Социялистична партия Сербиї, Єдинствена Сербия-Драґан Маркович Палма”, хтори по основи 8,25 одсто гласох тиж будзе мац осем одборнїкох.
Лїстина „Лиґа социялдемократох Войводини-Ненад Чанак” достала 7,29 одсто гласи и шейсц мандати, а тельо одборнїкох будзе мац и „Демократска странка-Др Велько Крстоношич”, за хтору гласали 6,8 одсто гласачох на локалних виберанкох.
Найблїжей под цензусом лїстина „Народни рух Динара-Дрина-Дунай-Томислав Бокан”, хтора достала коло 4,15 одсто гласи.
Пре меншински статус лїстинох, до Скупштини Нового Саду найскорей войдзе и Союз войводянских Мадярох (коло 1,35 одсто гласох) и Желєна странка (коло 1,6 одсто), можебуц и „Анї єден з понукнутих одвитох”.
На локалних виберанкох у Новим Садзе участвовали 16 лїстини, з хторих шейсц у статусу меншинских, цо значи же нє завиша од цензуса (пейц одсто), алє им за мандат нєобходне досягнуц „природни праг”. При виходносци од 55 одсто, то коло 2 200 гласи.