БЕОҐРАД – Доручованє рахункох гражданом за потрошену струю за януар пожнї пре ураховйованє и телевизийней предплати за явни медийни сервиси – Радио-телевизию Сербиї (РТС) и Радио-телевизию Войводини (РТВ), понеже ше ТВ-предплату од початку рока та надалєй будзе наплацовац прейґ рахункох за струю, сообщене з „Електропривреди Сербиї” (ЕПС).
ТВ-предплата тераз состойна часц рахунку за струю и на нїм, як 13. ставка будзе виказана и такса за медийни сервиси, хтора 150 динари мешачно.
Пре пожнєнє рахункох предлужени термин за виплацованє за струю, та место по 25. фебруар, рахунки годно плациц по 29. фебруар. Як и дотераз, трошителє котри на час виплацую рахунки, а тераз то будзе по 29. фебруар, маю 5 одсто попуст.
Убудуце, без огляду на потрошену струю, рахунок будзе векши за 150 динари, и тоту таксу ЕПС будзе уплацовац РТС и РТВ, без огляду на тото чи гражданє виплацели струю, чи нє. Прето и нєплаценє такси ЕПС будзе раховац як длуство за струю.