НОВИ САД – После прешлорочного подписованя Спорозуменя о медзиреґионалним сотруднїцтве у Пряшове, делеґация Пряшовского самуправного краю зоз Словацкей Републики, хтору творя Радослав Чуха, Петер Сокол, Марґарета Ґайдошова и Мирослав Буйда, вчера урядово нащивела АП Войводину. Домашнї им були подпредсидателє Скупштини АП Войводини Ана Томанова Маканова и Тихомир Вребалов, як и покраїнски посланїк Славко Рац.
Подпредсидателька Скупштини Войводини и предсидателька Националного совиту Словацох у Сербиї Ана Томанова Маканова медзи иншим гварела же сотруднїцтво реалне у обласцох за хтори Спорозуменє подписане, а терашнї сход крочай далєй у институционализованю його витворйованя.
Предсидатель Националного совиту Руснацох и покраїнски посланїк Славко Рац з тей нагоди надпомнул же инциятор подписованя того Спорозуменя бул Йоаким Грубеня, же би ше давно розпочате сотруднїцтво през институализованє дзвигло на висши уровень. Сотруднїцтво з краянами у Словацкей и дотераз було удатне, а з подписаним Спорозуменьом будзе преширене и на други обласци и подзвигнуте на висши и квалитетнєйши уровень.
Спред делеґациї госцох, Радослав Чуха на вчерайшим сходзе наглашел же подписане Спорозуменє отвера можлївосц сотруднїцтва двох крайох прейґ числених проектох, а єден з нїх проєкт Европскей униї хтори ше одноши на образованє – „Програма 7”. Сотруднїцтво можлїве и през лоґистичну и фахову помоц менаджерох, а конкретнєйши приклади сотруднїцтва прейґ Спорозуменя мож очековац у другей половки того рока.
Делеґация Пряшовского самоуправного краю вчера у Скупштини Войводини мала и роботне стретнуце з представителями националних совитох Словацох и Руснацох у Сербиї, директорами заводох за културу войводянских Словацох и Руснацох, як и представителями одсекох за словакистику и русинистику на новосадским Филозофским факултету.
Директор нашого Заводу Серґей Тамаш визначел дзепоєдни конкретни програми у обласци култури хтори уж того року буду витворени дзекуюци Спорозуменю, а др Янко Рамач же Филозофски факултет подписнїк догварки проєкту Европскей униї „Еразмус Плус”, прейґ хторого сотруднїцтво и дзень нєшка актуалне и добре.
Попри спомнутих, спред Националного совиту Руснацох на сходзе присуствовали и предсидателька Одбору за образованє Мелания Римар и предсидатель Одбору за информованє Иван Сабадош.
Тиж так, госци зоз Словацкей вчера бешедовали и з членми Одбору за европски интеґрациї и медзиреґионалне сотруднїцтво Скупштини АП Войводини, а нєшка перше у Бачким Петровцу, а потим у Руским Керестуре, нащивя найзначнєйши институциї войводянских Словацох и Руснацох.
