СРИМСКА МИТРОВИЦА – У Городскей хижи у Сримскей Митровици гражданє можу хасновац услуги реконструованого Услужного центру, з наяву же уж шлїдуюцого року Митровчанє з дому, електронски, годни достац 90 одсто услуги городскей администрациї.
Як виявел началнїк Городскей управи за общи и заєднїцки роботи Мирослав Йокич, до реконструкциї Услужного центру уложени вецей як два милиони динари и, гоч Услужни центер нє ма вельку финансийну вредносц, вон приноши нови квалитет у даваню услугох гражданом.
Услужни центер тераз ма 11 функционални шалтери, число занятих нє звекшоване, алє вихасновани капацитети знука городских управох, а шицко подредзене цо кратшому затримованю на шалтерох.
– Кажди рок през Услужни центер прейду медзи 80 и 90 тисячи людзе, односно шицки гражданє на териториї городу. Минималне затримованє на шалтерох од три до пейц минути, а кед треба пополнїц одредзену документацию вец ше, штреднє, на шалтеру нїхто нє затримує длужей як 15 минути – гварел Йокич.